Plantun de Prouvènço

Pèr coumpara dos planto d'encò nostre

Seseli annuum subsp. carvifolium & Ononis spinosa subsp. antiquorum

Seseli annuum subsp. carvifolium

Apiaceae Umbelliferae

Noms en français : Séséli à feuilles de carvi, Séséli annuel.

Descripcioun :
Aquéu grand-juvert dóu gènre Seseli èi pas gaire coumun, e se rescontro soulamen dins li relarg mountagnous. Se destrìo dis àutris Seseli bonodi lou noumbre de rai de si brout (oumbello) qu'èi bèn mai impourtant (12 à 18), à sa cambo que fai pas de zigue-zague, à si bratèio qu'an un marjo escariouso e peréu à si fueio que dounon d'èr à-n-aquéli dóu càrvi.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : (0,2)0,3 à 0,6(1) m
Fueio : alterno
Tipe bioulougico : Teroufite
Cicle bioulougico : Renadivo mounoucarpico

Gènre : Seseli
Famiho : Apiaceae
Famiho classico : Umbelliferae

Ordre : Apiales

Coulour de la flour : Blanco
Petalo : 5
Ø (o loungour) enflourejado : 3 à 6 cm
Flourido : Estiéu

Sòu : Ca
Autour basso e auto : Pancaro entresigna
Aparado : Noun

Liò : Tepiero seco - Roucas - Roucaio - Basso mountagno
Estànci : Subremediterran à Subaupen
Couroulougi : Ouroufito-Ouèst-Aupenco
Ref. sc. : Seseli annuum subsp. carvifolium (Vill.) P.Fourn., 1937

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.